Na ewadikan.
Aseak lusek egangitos Mp loko Kide nakoibuga Solot Herbert Edmund Ariko kesi igwokitos akitukes ilakilakete akanin ka ileuc swii akaulo na je alimor nu aijal eibuga loko Solot kide kanuko Gweri.
Ebebiface nges adau aitigogong ebe elosi ainged apuwa kobuku Gweri kedolu asewo na ekaru 2026, apolou ke ebe luko pate loka FDC kes kwana esangadete idudei noi kanu abwaan kec Moses Attan Okia.
Attan nges ewomitai bala ebuni aitelekar asewo na ebunit karia etepi edou, karai kecai akolong.
Lusek arasi egangitok ke Ariko kes itakadikina noi ebe esurum ariko kes ileic ido esurum epate loko NRM da ileuc.
Lu ipu kakesi kes edoditos Girigori Mikairi Egunyu losek arai LC.V loko solot kanu ebe aigur itunga akwes.
Egunyu nges ediopet kangun sek apolokinitos aisupio na aseeta kanu Ariko kotoma aseo na atubor.
Rose Mary Akulo asean nako Moruapesur ka Stella Apeco kes mam iyalamasi ebe naarai mam Ariko ilelebikit aisumuneta ke ne ejasi igurupun kec lu angor.
“Itoronit isio Egunyu noi kanu kolojet abunere aingalingal isio keda Ariko ebe epote aigang igurupun kosi lu aimon, esumunikitai egurupu kosi apiyai imilionin iwoni ebe karai etub Ariko”, elabilabi Akulo.
Kwangin asubusin nuko sokoni kalo Moruapesur kes igwololitos kesida noi kanu aisumuneta kec.
“Ibuni isio aidiyar itoni Opuyo oreke Egunyu naarai angop ariko, ipupi isio ebe ekori kwana je isirigin Gweri komam etacit er isio aseak ke”, inera Apeco da.
Konye Egunyu nges mam ewadikan abu kopedo airigaun nu akituk ke karaida ewolobobotos aseak neke.