By Peterson Otwakai O
Gweri – MP lo kide nako Soroti, Herbert Edmund Ariko, ngesi aketaki itunga lu obuku Gweri (ocaalo kec) amotoka na bamar kosingirir korai alosikinet aitebeben elose kobuku lo obukec.
Abu Ariko kolimok lu iyemuto ebe apas ngesi aipup lem aimony na itunga lu obuke, kosodi do ngesi elope aitojokaar aketun amotoka (fuso) na elosi eilate ebuku Gweri keere aingaranakin itunga kotoma oitolose lo iboro kwape nat icolongoi ka iwemai asubanasia. Ebuni da amotoka ngin aigugunate lu elosete toma oibworo aimor ican ka opucito icie.
“Erai na ainakinet na elomunit otau ka kwape aminar eong ore. Mam ecaki asesen itunga ka itaaritos, konye ajai eong. Amotoka kus ngin. Kitosomata ejok. Kemunaar, erai egaraama ka aitemokin,” abala Ariko, kodesitos Igweritok kuju bala ikanyum okiala.
Chris Ogulei, papa eicolong lo Aukot, ngesi abala ebe, adolun na amotoka kangin, elosi awoor alangir na lem ecikakit kwesi kwape engarenok luo kwap.
“Eswama Ariko nu ajokak noi. Kibuni aanyun ebe idario amotoka ngin ejok tetere ingarakit itunga wok,” abala Ariko.
Peter Ebau ayaiton Awaliwal, ngesi abala ebe ebuni kwana amotoka ngin aitebeben eitolose lo itunga ka iboro kotoma asubanasia kacut atwakisia.
“Ketakanu kwana ationis, erai ainom esimu bon, kodoluni amotoka aingarakin ekale lo ejai ationis. Kilipit do Hon Ariko koyau abiolos da. Kocauni Gweri,” abala Ebau.
Ebongokini akiro abiolos, iwemai kede icolongoi, abala Ariko ebe ngun keere epote aitodolikin.
Ariko, ngesi osabiiti loatubor abu kolot ocaalo ke lo Damasiko, Awaliwal, Gweri, kosodi aicikakin akan oitaabo kec lo NRM, aitigogongoor kodoco ebe, elosi aibwot obuku Gweri kosodi aigwo kwape MP kedolu aseo okaru 2026, dodo nu epote kopotu!
Alimor ke, nesi alacu iyalam obuku Gweri, neda ebilerikina egangitok ke airimirim icaaloi luko Gweri aibeliaanar iyemuto ngun.
Bian napona, abu Ariko kilatoo otemwan luko Gweri; Awaliwal, Gweri kede Aukot, amalan ateker ke, kikariete irotin keere aima ‘oreet lo didi’ kec.
Arai kekutakin epiriigi kanu aseo na ebunit, eomitai ebe ebuku Gweri ngesi epote akonye keere asesen, naarai ebeit itomia ainomun ebela lo erai Kristo bon etiaki. Ebeit akwap aduo!
