Na Steven Ocici
Ebolobol kanu amariaun emakuk loka atupiton apolon eicolong ko kide nako Uganda kopate loka NRM nes kwana idopit pee bala asaran na emukaru.
David Calvin Echodu abaran lo koibuga solot nges bere ekisokin kiding erot aigalikin Capt. Mike Mukula lo ejanaki adaun ikaru itomon.
Echodu nges ewunya noi bala ewolobosi ido elaira aitolomun aijulakinet koingarenone lo epate arai emunokinos nges aseak.
Esumun aisimorikikin itunga kanu apol, aikeun angaleu, Asioman, Irotin ka akerianut kowai lo aisiner engarenok luka apugan nako kuju, aitelekarit President Yoweri Kaguta Museveni.
Kanaemukaga pac, ilukumin luka itunga kes ediyaara nyid bala ebulolo laije alaro naka aboliasio koibuga Solot kanu aitodikin Ecodu amina kec.
Echodu nges abu kitoronarite engarenone ke Mukula kanu atyakit ateker, ebit ka amanus aisimorikikin engarenok.
“apeleikinet ka nges aitolomun amuno na itet ko Pate loka NRM, a dau eong aidotun etau, ka aiperikin atorobu kwap ka nukus”, ilairai Ecodu.
Echodu nges Naiwongonet lolo erimo arii nako Lango kanu aisup asseta ke ido apotu teni ilangoi da ijautu nges kwape Esabu.
Irabakini aseak nuko Lango ko alaroik nuko Lira, Abu kilip kes aimorikikin kanu aitolomun aijulakinet lolo ana cut.
“Inacan ka, alosi eong aingarenikin yesi komam aisek ikur kobaale, emorikikinos nepepe kanu aitopol arii wok”, enera Echodu.
Engarenok luka epate kodistrikitan luko Langa kesi adautu aicik akanin ailaira ebe ekwesete Echodu kanu ailokor Mukula.
Moses Akibwa ka Nelson Okwir engarenok luko Lira ka Dokolo kes icie kangul alimoros aigang Echodu ko Lango.
Ecodu nges inyamitos engarenok luko Teso aimoriarit Augustine Otuko, Charles Elasu, Teddy Acam ka icie da swii.
Keja ngun da, Mukula nges kwana eyarit aiterot bala ipwoo yen iposit edou, ido iketa ebe ebuni ailedokin oicolong ke.
Inera koredio ke loko Voice of Teso pac, abu imuwa lu itoronaritos nges kobala ebe iswamat nges iboro lu ipu noi kotoma aijanakin ke.
Ibuni ainyikokit asesen nu etupakinete kotoma abolobolo kec ido imaikini ijo nu etwakete.