Na Ewadikan
Mp lo koibuga Solot Too, Jonathan Ebwalo Ewololoit nges emwanikit noi aijojakit lailo ka laije kanu atamit aikat erot lo aibong airabet kotoma aseo na ebunit kokaru 2026.
Ebwalu nges lem itwasamai acowasinei Oculi ka Opooi kanu aile akadin ke nuka politics.
Itunga lu ipu anatar Teso kes epiko amisiikin jokan epate lo esipor Ebwalu karaido enapit nges ajulo nu bululu kanu aituputooro amerein.
Ebwalu lo ewolobobot ebe erai nges loko FDC nges abu kideleleu kotoma aseo na etemunio koibuga Kide neda abu ngesi kobilakina opaupake abotet Moses Attan Okia loko FDC, kosodi aigang Herbert Edmund Ariko loko NRM, iboreda yen abu ijangak isolota kere akwes.
Akaulo na apakio adis, Ebwalu nges abu kirabak ateker koredio loko Voice of Teso ebe erai nges loko FDC ido egangit nges Ariko kwabo mere epate loko NRM.
Aseak ke nu ipu kes apotu ikamutu anyunyura na aligani iteibala egeyana okotosi ti ebe aidotor nges da koicolong kanu agongara ne ajai Ariko.
Erurumau Mukula da!
Adaunitos alibuneta kosi aideleleun ebe Atupiton apolon eicolong loko NRM arii nako Kide George Mike Mukula nges ikunyukunyas noi ka Ebwalu kanu obeberanut ke.
Aiyaya nges itodie ebe Ebwalu nges eswamanara noi ka Mukula ido abu sek Mukula ka lu apolok icie luko NRM itwasamaete Ebwalu kanu aingic aiyaya nako FDC kwa eraar nges lo ituputooro.
Icie kangun lu eyakitos ebwalu nges Araban na airabet Annet Anita Among.
Mukula nges edodit Ebwalu kanu abeberanut ke, ailac akiro taitai nu da itoronitos epate loko NRM, acie kakesi kes imoriaritos akiro nu akinyet na enwakunio pac koteso ka ekaviyo lo pac epurujauna kosokoni.
Ebwalu nges kwana emwanikit noi aijojakit kobalada ebe itukurianitai aijar ke, elimonokini isolota.
Abongu konye Ecodu ewunya.
Losek eneket aigwok eicolong ko Too nakoibuga Solot Calvin Ecodu nges adau aidukur aseak kanu aidotor Ebwalu iboreda yen itukurianit Ebwalu noi.
Ecodu lo epalal akan nges ejurusi egangitok iteibala ikok iboreda yen esubit bala mam ecamakit Ebwalu ainapakina akuware ka aparan naarai aseak kes elairata aigogolor nges.
Naesabiiti, Ebwalu nges abu kolimok aseak nu Arapai ebe elosi bobo ngesi aitub ka abotin 70% kuju aseo kana ebunit.
“Arai ekotoi arai mam, ebeit bobo eong aitub kwape MP loko Soroti City West, ido abuni eong aisurum ajokit ileuc”, elabilabi Ebwalu.