Na Peterson Otwakai
Ejaasi imoru toma. Ejaasi ikito. Ejaasi ibaatin. Enyamio agaria kede ikolei. Epol eriga kotoma. Etumete ikiliok. Kosenyete angor.
Elukunitos isama kwape nat Awoja. Elukunit Kyere. Elukunit Asuret.
Kipup ijo aitetemet ngin kadio aiboisit keere kokwap akolong, ojeni ijo ebe Aukot kwana nen.
Aukot ber aani na?
Erai na Aukot na obuku Gweri ko Soroti distrikt. Kinyonyoikin Gweri kwape ebuku, opakunete do Aukot da kwape etem.
Akepolou, ikowai kwana Aukot da kwape ‘Atem-kiala’.
Otem ngon, nesi eurikitai asot na ebe Samuel Ojebe Enyamuret- Emonyio Epalio. Abu Lokasuban kinyaka ngesi. Komonyete teni kede aipal (kijaa Lokasuban emoyo ke kotoma aipuc na ikaru keere-Ameen🙏).
Otem ngon (Aukot), nesi erukum eteluna, Herbert Edmund Ariko ‘Okoku-reet’.
Epupi lem Ariko atatarasio nu itoritos IWUKOTA (itunga lu Aukot), koomite ebe eraasi ERWOM. Epupete IWUKOTA da ekiror ARIKO, koomitos ebe ERWOM.
Konye Naemukaaga nabian, apotu ERWOM kede ERWOM, kiriamunos, koduo akwap!
Ekare, aicakun ajosi na amwaka nuke noi kidiyai etem Aukot anyoun omoru lo Kapir toni alaro na adekis – etungat bon!
Kepuputu IWUKOTA ebe abeit Ariko aicak ‘ore’, toni alokak da aisal alosit ocor kanu aisokun ocaalo lo Ariet/Osuguro ne esipor etem ka adekis.
Ameun kocaaloi lu osiang na Aukot kwape na Okolei, Oburi-Agulei, Kaler, Somalia, Akuja, Opar, Ajama, Amuda, Otidonga, Asingei, Awoja toni Ikokolemo lu Opuyo da apotu kisiokutu otem Aukot kanu angoliaar ‘Ingai ber Arikooooo….’.
Kelomu iko aberu ayaa amotoka, kosodi Aukot United Band (Ojebe Junior) anangakin akeebe, waaaaaaaah!! Kimorumorun etem! Aisekel iwos kobala Aukot biiirrrrrrr!!
Abu do Ajosi kipurujaik Etem!! Kodakitete Ariko teebe apakio kolo Hajji Umar Okodel ko Kumi. Takwee!!!
Aipejokin adekis
Aponi kilatoorere Ariko adekis na Aukot Health Centre 2, neda abu ngesi da kosesenia ejautene lo sogim lo itorit adekis. Abu kiturur, kosodi arasakin aketakin adekis itaadan iuni ber kanu nutatoto nu idoete aijamama kotoma.
Abu kisumunik aremun aremun bobo ikany, kosodi iyarei lu ilatatatar imukerun kidoun. Epote itaadan lu okodasi kede ipwalisin, aisuukai ka ibilaagitin luyumuk lu igaete aiterot.
Amudaki Awoja Community SS shs10m
Egolokini do apejo ke, abu Ariko kireik esomero lo epwakunitos auriak ikulepek – Awoja Community SS. Esiomete esisiak lu atukono nu itukitai kede aderun ka akopit. Kemotun edou lo inyamit ekwam, epedori amudar esomero kede esisiak amear osamai lo Awoja, koyauni arorwa.
‘Kalosi alemikin esomero imilionin itomon kanu ageuna adukio na atukono aarei nu ekupup kanu esisiak awadia ekalamu kailajaara. Ekoto aduko kogeun katipet noi,” agata Ariko, lo imiela abwoikin ebuku Gweri kairabet, kinepu aseo okaru 2026.
Abu Ariko kisumunik Osuguro PS da (esomero lo epwakunitos auriak), agangat na ingarakini adukunio na atukono aarei. Ekoto ngesi atukoni aibwo, eroko idwe luko P.5 kwape kwana elomara
Kwape ekisil ke: EINER KEDE ASWAM.
Apotu IWUKOTA ogatutu, kosodete ainyoonyoikin Ariko kobalasi, “Iyapit do ber ijo da. Ojai kolo epone elemarere lo ejai oicolong kopaana, ti kwana ijo ilomaa da. Apas isio ainyam emagira lo iragaatai….Ariko, kobiaaaaaaaaa!!!”
Elalaete angor kede amuyooonor, kobisete ikiliok eiwiny nekibalaayi!!!
Ongedari bodo Ojebe Jnr akeebe, isiarusiarunos lu ajosi abukal ekosio, kotunanaros aibeliaar iyalam. Lu ekulut da, apotu odaututu nukec.
Acie akiro inamainos!
Araasi itunga *ENYIRIRI!*
Ajijim Aukot!
Ekote nen